Parking Movie review

ஓய்வு பெறும் நிலையில் உள்ளவர்கள் எப்படி இருப்பார்கள், அவர்களின் மனநிலை எப்படி இருக்கும், அவர்களுக்கும் இக்கால தலைமுறைக்கும் உள்ள இடைவெளி எப்படி உள்ளது என்பதையும் மறைமுகமாக சொல்லப்பட்டுள்ளது. முக்கியமாக, வெகு நாட்கள் மரியாதையாக வாழும் பகுதியில், ஒரு சின்னப் பையனால் அசிங்கப்படுவது, எரியும் தீயில் எண்ணெய்யை ஊற்றுவது போன்று இருக்கிறது.

எம்.எஸ்.பாஸ்கர் கோபம், வன்மம் மற்றும் வெறுப்பு என அனைத்து விதமான உணர்வுகளிலும் தனது நடிப்பால் கவனிக்க வைக்கிறார். ஆனால், ஹரீஷ் கல்யாண் கோபப்படுகிறாரே தவிர, மற்ற உணர்வுகளில் எல்லாம் எம்.எஸ்.பாஸ்கர் முன்னால் கொஞ்சம் குறைந்தே காணப்படுகிறார். படத்தில் ஒருவர்தான் வில்லன் என நினைத்து விட முடியாது. ஏனென்றால், இருவருமே வில்லத்தனத்தில் ஈடுபட்டு கலவரம் செய்கிறார்கள்.

பார்வையாளர்களுக்கு இருவர் மீதும் கோபமும், இரக்கமும் வருகிறது. இந்துஜா, கர்ப்பமான பெண்ணாக ஒரு நல்ல கதாபாத்திரத்தில் நடித்திருந்தார். எம்.எஸ்.பாஸ்கர் மனைவி மற்றும் மகளும் தங்களது கதாபாத்திரத்திற்கு தேவையான நடிப்பை வெளிப்படுத்தி இருந்தார்கள்.

ஒளிப்பதிவு, எடிட்டிங் மற்றும் இசை ஆகியவை, ஒரு சாதாரண படத்தை கேட்&மவுஸ் படமாக மாற்றி இருக்கிறது. சாம் சி.எஸ்-இன் பாடல்கள் பெரிய அளவிலான தாக்கத்தை ஏற்படுத்தவில்லை என்றாலும், பின்னணி இசை படத்தின் மீதான ஈர்ப்பை அதிகரிக்கிறது. படத்தில் இருவருமே நல்லவர்கள்தான். ஆனால், அவர்களின் சூழ்நிலைக்கு ஏற்றவாறு, பிழைப்பைக் கெடுக்கும் அளவிற்கு வில்லத்தனம் செய்கிறார்கள்.